ഗാന്ധിനഗര്‍ 2nd സ്ട്രീറ്റ്- രണ്ടാം ഭാഗം..
ഇത് ഒരു രണ്ടാം ഭാഗമാണ്...ഗാന്ധിനഗര്‍ 2nd സ്ട്രീറ്റ് എന്ന സിനിമയുടെ രണ്ടാം ഭാഗമല്ല.. സഹമുറിയനെന്ന ബ്ലോഗ്ഗിന്റെ രണ്ടാം ഭാഗം..
സഹമുറിയനെ അടുത്തറിഞ്ഞില്ലാത്തവര്‍ താഴെ കാണുന്ന ലിങ്കില്‍ ക്ലിക്ക് ചെയ്യുക...
കഥ : ഫിറോസ്‌ കണ്ണൂര്‍.
തിരക്കഥ: പ്രകാശ്
സംവിധാനം: ഷിനോജ്
ബാക്കി സ്ക്രീനില്‍..സാജിനെ എങ്ങനെ ഒഴിവാക്കണം എന്ന് ഞങ്ങള്‍ തല പുകഞ്ഞാലോചിക്കാന്‍ തുടങ്ങി..
തലയില്‍ നിന്നും തീയും പുകയും വന്നതല്ലാതെ ഞങ്ങളുടെ തലയില്‍ ഒരു വഴിയും തെളിഞ്ഞു വന്നില്ല..
അങ്ങനെ മറ്റൊരു ദിവസം,,
റൂമില്‍ ഞാനും പ്രകാശും ഷിനോജും..
ടീവിയില്‍ സിനിമ വെച്ചിട്ടുണ്ടെങ്കില്‍ പോലും ഞങ്ങളുടെ ആലോചന മുഴുവന്‍ സാജിനെ എങ്ങനെ നാട് കടത്തും എന്നതിനെ കുറിച്ച് തന്നെ..
പൊടുന്നനെ, എന്തോ കണ്ടു പിടിച്ചത് പോലെ ഷിനോജ് ചാടി എണീറ്റു..എന്നിട്ട് വിളിച്ചു പറഞ്ഞു,
"യുറേക്ക.."
"ആരാന്നാ??"
"അവനെ പുറത്താക്കാന്‍ ഒരു വഴി കിട്ടിയെന്നു.."
"എന്ത് വഴി??" ഞാനും പ്രകാശും ഒരുമിച്ച് ചോദിച്ചു..
പക്ഷെ അതിനു മറുപടി തരാതെ അവന് സിനിമ കാണുന്നു..
കുറച്ചു നേരം അവന്റെ മുഖത്ത് നോക്കി നിന്ന ഞങ്ങള്‍ക്ക് കലി കയറി..
"എന്ത് വഴിയാണെന്ന് പറയെടാ തെണ്ടീ....................." ഞാന്‍ അലറി..
"അതാട ടീവിയില്‍ ഇപ്പൊ കണ്ടു കൊണ്ടിരിക്കുന്നത്.."
അവന് അത് പറഞ്ഞതും ഞാനും പ്രകാശും ടീവിയിലേക്ക് നോക്കി...
ടീവിയില്‍ "ഗാന്ധി നഗര്‍ സെക്കന്റ്‌ സ്ട്രീറ്റ്" എന്ന മോഹന്‍ലാല്‍ സിനിമ....
വീട്ടില്‍ വലിഞ്ഞു കേറി വന്ന മോഹന്‍ലാലിനെ ഒഴിവാക്കാന്‍ ശ്രീനിവാസന്‍ പ്രയോഗിക്കുന്ന വഴി..
അതേ.. ആ വഴി തന്നെയാണ് ഇനി ഞങ്ങളുടെയും വഴി..
സിനിമയില്‍ ആ വഴി ചീറ്റി പണ്ടാരമടങ്ങുന്നത് കണ്ടു എന്റെ സന്തോഷത്തില്‍ ഒരല്‍പം കുറവ്,,
"അളിയാ.. ഐഡിയ സിനിമയിലെത് ചീറ്റിപ്പോകുമോ???" ഞാന്‍ ചോദിച്ചു..
"ഹേ.. ഇല്ലട.. ഇത് സിനിമയല്ലേ.. ജീവിതത്തില്‍ ഈ ഐഡിയ ഏക്കും"
ഷിനോജ് തറപ്പിച്ചു പറഞ്ഞു..
ഇതനുസരിച്ച് ഞങ്ങള്‍ തിരക്കഥ തയ്യാറാക്കി..
ഒരിക്കലും ചീറ്റിപ്പോകാന്‍ പാടില്ലാത്ത ഒരുഗ്രന്‍ തിരക്കഥ..
ആ തിരക്കഥ ഞാന്‍ വിശദീകരിച്ചു....
ഇന്ന് അവന് വന്നു കയറിയ ഉടനെ,നമ്മള് മൂന്നു പേരും നിരാശരായി ഇവിടെ ഇരിക്കുക.. അപ്പോള്‍ അവന് കാര്യം അന്വേഷിക്കും..
മൂന്നു പേരും എറണാകുളം ജീവിതം അവസാനിപ്പിച്ച്‌ നാട്ടിലേക്കു പോകുന്നു എന്ന് വ്യസനസമേതം സാജിനെ അറിയിക്കുക....
അടുത്ത വെള്ളിയാഴ്ച അത്യാവശ്യം ഡ്രസ്സ്‌ എടുത്തു ബാക്കി സാജ് കാണാതെ ഒളിപ്പിച്ചു വെച്ചതിനു ശേഷം നാല് പേരും റൂം വിടുന്നു..
(സാജിനെ കെട്ടിപ്പിടിച്ചു കരയാന്‍ മറക്കരുത്..)
കലേഷിനെ വിളിച്ചു പറഞ്ഞതിന്റെ അടിസ്ഥാനത്തില്‍ ഒരു റൂം സങ്കടിപ്പിക്കുന്നു..
അവിടെ ഒരാഴ്ചത്തെ സുഖവാസം ..അപ്പോഴേക്കും സാജ് വേറെ റൂം സങ്കടിപ്പിച്ചു അവിടെ താമസം തുടങ്ങിക്കാണും..
ഒരാഴ്ച കഴിഞ്ഞു ഞങ്ങള്‍ വീണ്ടും റൂമിലേക്ക്‌..
പിന്നെ ഓണറുടെ ഉറക്കം കെടുത്തി സുഖ ജീവിതം വീണ്ടും....
തിരക്കഥ എല്ലാവരും കയ്യടിച്ചു പ്രോത്സാഹിപ്പിച്ചു.. വാട്ട്‌ അന്‍ ഐഡിയ..!!!!!!!!!!
അങ്ങനെ സാജ് വരുന്നതും കാത്തു ഞങ്ങള്‍ വരാന്തയില്‍..
ഒരല്‍പം കഴിഞ്ഞപ്പോള്‍ കയ്യില്‍ ചെരുപ്പുമായി സാജ് കയറി വരുന്നു..
"എന്തിനാടാ ചെരുപ്പ് കയ്യില്‍ വെച്ചിരിക്കുന്നത്??"
കണ്ട ഉടനെ സംശയം അടക്കവയ്യാതെ ഞാന്‍ ചോദിച്ചു..
"രാത്രി ആര് കാണാനാ. കയ്യില്‍ വെച്ചാല്‍ ചെരുപ്പ് തേഞ്ഞു പോവില്ലല്ലോ.. അത് കൊണ്ടാ.."
ദൈവമേ.. ഇത്രേം ബുദ്ധി ആര്‍ക്കും കൊടുക്കല്ലേ....
ഞാന്‍ മനസുരകി പ്രാര്‍ത്ഥിച്ചു..
ഇനി ഞങ്ങളുടെ തിരക്കഥയിലേക്ക്..
മുന്‍കൂട്ടി തയ്യാറാക്കി വെച്ച പൊസിഷനില്‍ ഞാനും പ്രകാശും ഷിനോജും സ്ഥാനമുറപ്പിച്ചു..
ഞങ്ങള്‍ വിദൂരതയിലേക്ക് നോക്കി ഇരിക്കുന്നു..
റൂം മുഴുവന്‍ ശോകമൂകം..
ഏതു നിമിഷവും കരയും എന്ന രീതിയില്‍ ഞങ്ങള്‍ മൂന്നു പേര്..
ഇതൊന്നും ശ്രദ്ദിക്കാതെ ടീവിയില്‍ പാചക രംഗം കാണുന്ന സാജ്..
സമയം കടന്നു പോയി..
ഞങ്ങള്‍ വിദൂരതിയിലേക്ക് നോക്കി ഇരിക്കാന്‍ തുടങ്ങിയിട്ട് അര മണിക്കൂറായി..
സാജ് ഒന്ന് മൈന്‍ഡ് ചെയ്യുന്നത് പോലുമില്ല..
"എന്താ കാര്യം എന്ന് ചോദിക്കെടാ തെണ്ടീ " എന്ന് വിളിച്ചു പറയാന്‍ തോന്നി..
പക്ഷെ ചോദിച്ചില്ല..
സമയം പിന്നെയും നീങ്ങി..
ഞങ്ങള്‍ വിദൂരതയില്‍ നോക്കി നില്ക്കാന്‍ തുടങ്ങിയിട്ട് ഇപ്പോള്‍ ഒരു മണിക്കൂറില്‍ കൂടുതലായി..
ഈ നില്‍പ്പ് തുടര്‍ന്നാല്‍ നാളെ രാവിലെ വരെ ഇതേ നില്‍പ്പ് നില്‍ക്കുന്നതല്ലാതെ വേറെ കാര്യമൊന്നുമില്ല എന്ന് മനസിലാക്കിയ ഞാന്‍ തിരക്കഥയില്‍ മാറ്റം വരുത്തി..
സംഭാഷണത്തിലും..
"നീ വിഷമിക്കാതെടാ ഷിനോജ്.. വിധി എന്ന് സമാധാനിക്ക്..."
വേദന കടിച്ച്‌ പിടിച്ചു ഞാന്‍ പറഞ്ഞു..
അത് കേട്ടതും ശിനോജിന്റെ കണ്ണില്‍ നിന്നും കണ്ണുനീര്‍ പ്രവഹിച്ചു..
"കണ്ണുനീര്‍ വേസ്റ്റ് അയാളും കുഴപ്പമില്ല, സാജ് ഒഴിവായാല്‍ മതി.."
അത്രമാത്രമേ അവന് ആ സമയം വിചാരിച്ചു കാണു....
ഇതൊക്കെ കേട്ട സാജ് പതിയെ എഴുന്നേറ്റു ഞങ്ങളുടെ അടുത്തേക്ക് വന്നു..
അവന് ഷിനോജിന്റെ തോളില്‍ കയ്യിട്ടു..
പിന്നെ അവനും കരയാന്‍ തുടങ്ങി..!!!!!
"അതെന്തിന്????????"
ഞങ്ങള്‍ മൂന്നു പേരും ഒരുമിച്ച് അവനെ നോക്കി..
"എന്തിനാടാ നീ കരയുന്നത്??"
ഞാന്‍ സാജിനോട് ചോദിച്ചു..
"ഷിനോജിനെ അവള്‍ ചതിച്ചു അല്ലെ?? ഇവന്‍ അതമഹത്യ ചെയ്യാന്‍ പോകുവാണെന്ന് മനസിലായി.. അതോര്‍ത്തപ്പോള്‍.... "
"എഹ്.. അവള്‍ ശിനോജിനെ ചതിച്ചോ?? അത് ഞാനറിഞ്ഞില്ലല്ലോ.. ദൈവമേ.. "
പ്രകാശ് നെടുവീര്‍പ്പെട്ടു..
"ബുദ്ധിയില്ലാത്ത അവന് എന്തേലും പറയുന്നത് കേട്ടു വെറുതെ നെടുവീര്‍പ്പെടാതെടാ ...... "
ഞാന്‍ പ്രകാശിനോടു പറഞ്ഞു..
"അവള്‍ എന്നെ ചതിച്ചതൊന്നുമല്ല.. " ഷിനോജ് കണ്ണീര്‍ തുടച്ചു പറഞ്ഞു..
"പിന്നെന്തിനാ നീ കരഞ്ഞത്??" സാജും കണ്ണീര്‍ തുടച്ചു കൊണ്ടു ചോദിച്ചു..
"നമ്മളിത്രേം നാളും ഒരു പായില്‍ കിടന്നു, ഒരു പാത്രത്തില്‍ ഉണ്ട് ഇങ്ങനെ ജീവിച്ചതല്ലേ.. അതിനി ഇല്ലല്ലോ എന്നോര്‍ത്ത് കരഞ്ഞതാ.."
"എഹ്.. നമ്മുടെ പാത്രത്തിനും പായക്കുമൊക്കെ എന്ത് പറ്റി??!!!!!!! " അവന് വേവലാതിയോടെ ചോദിച്ചു..
പായേം പാത്രോം പട്ടി കൊണ്ടു പോയി.. അല്ല പിന്നെ...
"ടാ.. പാത്രത്തിനും പായക്കുമൊക്കെ ഒന്നും പറ്റിയില്ല.. ഞങ്ങള്‍ മൂന്നു പേരും എറണാകുളം വിടുവാ.. അതാ പറഞ്ഞത്.. "
ദേഷ്യം കടിച്ചുപിടിച്ചു വീണ്ടും ഷിനോജ് പറഞ്ഞൊപ്പിച്ചു..
"നിങ്ങള്‍ എങ്ങോട്ട് പോകുന്നെന്നാ .. ??"
അത് കേട്ടപ്പോള്‍ ഷിനോജ് ഒന്ന് കൂടി വിതുമ്പി..
അവന് ഡയലോഗ് മറന്നു പോയതാവും എന്ന് കരുതി ഞാന്‍ കേറി ഉത്തരം കൊടുത്തു..
"എറണാകുളം ജീവിതം മടുത്തു.. ഇനി ഞങ്ങള്‍ നാട്ടില്‍ പോയി സെറ്റിലാവാന്‍ തീരുമാനിച്ചു.."
"നാട്ടില്‍ അതിനു എന്ത് പണിയാ ഉള്ളത് നിനക്കൊക്കെ??"അവനു സംശയം..
"ഞാന്‍ വല്ല കോഴി കച്ചവടോം തുടങ്ങാന്‍ പോകുവാ.." പ്രകാശ് പറഞ്ഞു..
"സിവില്‍ എഞ്ചിനീയറിംഗ് വിട്ടിട്ടു കോഴിക്കച്ചവടം തുടങ്ങാന്‍ പോകുന്നോ?? നിനക്കെന്താടാ പ്രാന്തോ??? "
"സിവില്‍ എഞ്ചിനീയറിംഗ് ഒക്കെ ഇപ്പൊ ഭയങ്കര നഷ്ടത്തിലാണ്.."
"ഞാന്‍ അതറിഞ്ഞില്ലല്ലോ.." എന്നായി അവന്റെ സംശയം..
നിന്നോട് പറയാന്‍ മറന്നതാകും.. അല്ല പിന്നെ..!!!!!
പക്ഷെ അവന്റെ സംശയത്തിനു ആരും മറുപടി പറഞ്ഞില്ല..
അവന് പിന്നെ എന്റെ നേര്‍ക്ക്‌ തിരിഞ്ഞു..
"നീയും കോഴിക്കച്ചവടം തന്നെ തുടങ്ങാനുള്ള പരിപാടിയാണോ??"
"ഹേയ് അല്ല.. ഞാന്‍ മീന്‍ കച്ചവടം തുടങ്ങിയാലോ എന്നാലോചിക്കുന്നത്.. അതാ ലാഭം... "
ഞാന്‍ അത് പറഞ്ഞപ്പോള്‍ അവന് കണ്ണ് മിഴിച്ചു എന്നെ നോക്കി..
"അപ്പൊ നീയോടാ ശിനോജെ?"
"ഞാന്‍ എന്റെ അപ്പന്റെ സ്ഥലം നോക്കി നടത്താന്‍ തീരുമാനിച്ചു.."
"ആഹാ.. നിന്റെ അപ്പന് സ്ഥലമൊക്കെ ഉണ്ടോ?? എത്ര ഏക്കര്‍ കാണും??"
"ഒരു പത്തു പതിനഞ്ചു സെന്‍റ് കാണും.. "
"ആഹാ.. അപ്പൊ ഒരൊറ്റ സ്ഥലത്ത് നിന്നും ചുറ്റും നോക്കിയാല്‍ മതിയല്ലോ..!!!!!! കഷ്ടം... ദൈവമേ.. മൂന്നു പേര്‍ക്കും ഒരുമിച്ചു വട്ടാവാന്‍ വട്ട് പകര്ചാവ്യാദിയാണോ ?"
"ആവാന്‍ വഴിയുണ്ട്.. നീ ഇവിടെ വന്നതിനു ശേഷമാ ഞങ്ങള്‍ ഇങ്ങനെ ആയത്..." എന്റെ മറുപടി..
പിന്നെ കുറച്ചു നേരത്തേക്ക് റൂമില്‍ ആരും മിണ്ടിയില്ല..
"എന്നാ പിന്നെ ഈ വെള്ളിയാഴ്ച നമുക്ക് റൂം ഒഴിയാം എന്താ??"
ഞാന്‍ എല്ലാവരോടുമായി ചോദിച്ചു..
"ആയിക്കോട്ടെ.."
ചോദ്യം തീരേണ്ട താമസം ശിനോജും പ്രകാശും ഉത്തരം തന്നു..
സാജ് വിദൂരതയില്‍ നോക്കി ഇരിക്കുന്നു...
അങ്ങനെ വെള്ളിയാഴ്ച വന്നെത്തി....അത്യാവശ്യം വേണ്ട വസ്ത്രങ്ങളും എടുത്തു ബാക്കിയുള്ളത് തട്ടിന് മുകളില്‍ ഒളിപ്പിച്ചു വെച്ച് ഞങ്ങള്‍ പുറത്തിറങ്ങാന്‍ തയ്യാറായി നിന്നു..
"അപ്പൊ നമ്മള് ടീവി കൊണ്ടു പോണില്ലേ??" സെന്‍ട്രല്‍ ഹാള്ളില്‍ വെച്ചിരിക്കുന്ന ടീവി നോക്കി സാജ് ചോദിച്ചു..
അപ്പോഴ അങ്ങനൊരു സാധനത്തിനെ കുറിച്ച് ഞങ്ങള്‍ ഓര്‍ത്തത്‌..
ഈ തെണ്ടിയോടു എന്ത് പറയും എന്നാലോചിച്ചു ഞാനും പ്രകാശും തലപുകക്കുന്നതിനിടയില്‍ ഷിനോജ് ചാടി കേറി മറുപടി കൊടുത്തു..
"അത് റൂം വാടക ഇനത്തില്‍ കുറച്ചാല്‍ മതി എന്ന് ഓണര്‍ ചേട്ടന്‍ പറഞ്ഞായിരുന്നു.. ഞങ്ങള്‍ മൂന്നു പേരും ചേര്‍ന്നല്ലേ അത് വാങ്ങിയത്.. അത് കൊണ്ടു ഞങ്ങളുടെ വാടക അതില്‍ കുറച്ചോളാം ..നിന്റെ കാശ് നീ തന്നാല്‍ മതി.."
"എന്റെ കാശും അതില്‍ നിന്നും എടുത്തോട്ടെ ചേട്ടന്‍.."
"അതിനു നീ ഷെയര്‍ ഇട്ടിട്ടില്ലല്ലോ ടീവിക്ക് .. പിന്നെ എങ്ങനാ അതെടുക്കുന്നെ??" പ്രകാശിന്റെ മറുചോദ്യം..
"വാങ്ങിയത് നിങ്ങള്‍ മൂന്നു പേരും ചേര്‍ന്നാണേലും കണ്ടത് നമ്മള് നാല് പേരും ഒരുമിച്ചല്ലേ.. അതുകൊണ്ട് എന്റെ കാശും കൂടി ടീവി ഇടണമല്ലോ.. "
എഹ്.. ഇതെന്തു കണക്ക്..
ഇനിയിപ്പോ നോക്കുകൂലി എന്ന് പറയുന്നത് ഇതിനാവുമോ???
ആഹ്.. എന്ത് പണ്ടാരമേലും ആകട്ടെ.. ഈ പിശാച് ഒന്ന് പോയാല്‍ മാത്രം മതി..
അത് കൊണ്ട് തന്നെ അവനു നോക്കുകൂലി കൊടുക്കാന്‍ ഞങ്ങള്‍ സമ്മതം മൂളി..
നാല് പേരും പുറത്തിറങ്ങി..
പിന്നെ പരസ്പരം കേട്ടിപ്പിച്ചു.. ഞങ്ങള്‍ മൂന്നു പേരുടെയും കണ്ണുകളില്‍ കണ്ണുനീര്‍ പൊടിഞ്ഞു..
സന്തോഷ കണ്ണീര്‍... !!!!!!
സാജ് അലമുറയിട്ടു കരഞ്ഞു...
വിരഹവേദന.. പാവം..!!!!!!
അങ്ങനെ ഞങ്ങള്‍ മൂന്നു പേരും കലേഷ്‌ ഒപ്പിച്ചു തന്ന റൂമിലേക്ക്‌..
ഓണര്‍ സന്തോഷപൂര്‍വ്വം ചിരിച്ചു കൊണ്ടു താക്കോല്‍ തന്നു..
പിന്നീടുള്ള ഒരാഴ്ച അയാള്‍ ചിരിച്ചില്ല..
അയാള്‍ വരും.. വീട് നോക്കും..
ഞങ്ങളോട് എന്തേലും ഒന്ന് പറയും..
ഞങ്ങള്‍ തിരിച്ചു ഒരു നൂറു കാര്യം പറയും...
അയാള്‍ തലയും താഴ്ത്തി തിരിച്ചു പോകും..
അങ്ങനെ ഒരാഴ്ച കഴിഞ്ഞു..
താക്കോല്‍ തിരിച്ചേല്‍പ്പിക്കാന്‍ നേരം ഓണര്‍ ഒന്ന് കൂടി ചിരിച്ചു..
"എന്തോന്നാ ഇത്ര കിളിക്കാന്‍???"
പ്രകാശ് കലിയോടെ ചോദിച്ചു..
"നീയൊക്കെ പോകുന്നതിന്റെ സന്തോഷത്തില്‍ ചിരിച്ചു പോയതാ.."
അതും പറഞ്ഞു അയാള്‍ ഒന്ന് കൂടി ചിരിച്ചു..
"ഇതാ നിങ്ങളുടെ ഭാര്‍ഘവീ നിലയത്തിന്റെ താക്കോല്‍.. ഇനി ഞങ്ങളുടെ പട്ടി താമസിക്കും അവിടെ.. "
അതും പറഞ്ഞു ഷിനോജ് അയാളുടെ നേരെ താക്കോല്‍ നീട്ടി..
ഇനി ഞങ്ങള്‍ ഞങ്ങളുടെ സ്വന്തം സ്വര്‍ഗത്തിലേക്ക്..
ഓട്ടോയില്‍ കയറി വീടെത്തി..
താക്കോല്‍ എടുത്തു.വീട് തുറക്കാന്‍ നിന്ന ഞാന്‍ ഒന്ന് തരിച്ചു നിന്നു..
"എന്താടാ?? എന്ത് പറ്റി??"
"വീട് അകത്തു നിന്നു പൂട്ടിയിരിക്കുവാ.. " ഞാന്‍ മറുപടി കൊടുത്തു..
"ആ തെണ്ടി ഓണര്‍ വന്നു കാണും വൃത്തിയാക്കാന്‍.. നീ ബെല്ലടിക്ക്.." ഷിനോജ് പറഞ്ഞു..
ഞാന്‍ ബെല്ലടിച്ചു..
വീട് തുറന്നത് എല്ലും തോലുമായ ഒരു രൂപം..
പിറകില്‍ അത് പോലെ തന്നെയുള്ള മൂന്നു വേറെ രൂപങ്ങള്‍ പല കോലങ്ങളില്‍ വരുന്നു..
"ഇവിടെയെന്താ ആരോഗ്യമില്ലാത്തവരുടെ ഫാഷന്‍ ഷോ നടക്കുവാണോ??"
അറിയാതെ ചോദിച്ചു പോയി..
"ആരാ??" ആ കൂട്ടത്തില്‍ നിന്നും താടിയില്ലാത്ത ഹരിശ്രീ അശോകന്‍ ഞങ്ങളോട് ചോദിച്ചു..
"ഞങ്ങളുടെ വീട്ടില്‍ വന്നിട്ട് ഞങ്ങളാരാ എന്ന് ചോദിയ്ക്കാന്‍ നീയാരാടാ..." ഞാന്‍ തിരിച്ചു ചോദിച്ചു..
പെട്ടെന്ന് കിരീടം സിനിമയിലെ കൊച്ചിന്‍ ഹനീഫയെ പോലുള്ള ഒരു രൂപം മുന്നിലേക്ക്‌ വന്നു..
അതവനായിരുന്നു.. സാജ്... !!!!!!!
"ആഹ്.. നിങ്ങളോ?? നിങ്ങളെന്താ ഇവിടെ??"
ഞങ്ങള്‍ മറുപടി പറയാതെ അവന്റെ പിറകില്‍ നിക്കുന്ന എലുമ്പന്മാരെ നോക്കി.. കാരണം അവന്മാര് ഇട്ടിരിക്കുന്നത് ഞങ്ങള്‍ ഒളിപ്പിച്ചു വെച്ച ഞങ്ങളുടെ പുത്തനുടുപ്പുകള്‍..
പ്രകാശിന്റെ കണ്ണ് നിറഞ്ഞു..
"ഇവരെ പരിചയപ്പെടുത്താന്‍ മറന്നു.. ഇവര എന്റെ പുതിയ റൂം മേറ്റ്സ്... "
എലുമ്പന്മാരെ ചൂണ്ടി സാജ് പറഞ്ഞു..
"അപ്പൊ ഞങ്ങളോ??"!!!!!!!
ഞങ്ങള്‍ പരസ്പരം ചോദിച്ചു..
മറുപടി ആരും പറഞ്ഞില്ല...
"അതിരിക്കട്ടെ ഒരു കാര്യം ചോദിയ്ക്കാന്‍ മറന്നു..നിന്റെ കോഴിക്കച്ചവടം എങ്ങനുണ്ട് പ്രകാശ്??" അവന് പ്രകാശിനോടു ചോദിച്ചു..
"കോഴീ.... കച്ചവടത്തിന്റെ കാര്യം പറഞ്ഞാല്‍ പറച്ചിലില്‍ നില്‍ക്കില്ല.. പന്നീടെ മോനെ.. "
പ്രകാശ് പല്ല് കടിച്ചു കൊണ്ടു മുന്നോട്ടു പോയി.. ഞാന്‍ പിടിച്ചു വെച്ചു..
പിന്നെടങ്ങോട്ട് കാര്യങ്ങളുടെ കിടപ്പ് വശം ഞങ്ങള്‍ വിശദമായി മനസിലാക്കി..
അതിങ്ങനെ..
റൂം വിട്ട സാജ് ഓണറെ കണ്ടു ഞങ്ങള്‍ എറണാകുളം വിട്ട കാര്യം വ്യസന സമേതം അറിയിച്ചു..
ഇത് കേട്ട ഓണര്‍ സന്തോഷം കൊണ്ട് തുള്ളിച്ചാടി..
പിന്നെ അവന് പുതിയ സഹമുറിയന്മാരെ എവിടെ നിന്നൊക്കെയോ ഒപ്പിച്ചു വീണ്ടും അതേ വീട്ടില്‍ താമസം തുടങ്ങി..
ഞങ്ങളുടെ മൂന്നു പേരുടെ കണ്ണുകളും ഇപ്പോള്‍ ശരിക്കും നിറഞ്ഞു..
ഇനിയെങ്ങോട്ട് പോകും??
"എന്നാല്‍ ഞങ്ങള്‍ ടീവി എടുക്കട്ടെ??" ഷിനോജ് സാജിനോട് ചോദിച്ചു..
"അതിനു ടീവി കഴിഞ്ഞ മാസത്തെ വാടകയില്‍ കുറക്കാന്‍ ഓണര്‍ പറഞ്ഞു.." അവന് ചിരിച്ചു കൊണ്ട് മറുപടി പറഞ്ഞു..
"കര്‍ത്താവേ.. "
എട്ടായിരം രൂപ കൊടുത്തു വാങ്ങിയ ടീവി നോക്കി ഷിനോജ് നെഞ്ചത്തടിച്ചു..
എലുമ്പന്‍മാര്‍ ഇട്ട ഞങ്ങള്‍ കാശ് കൊടുത്തു വാങ്ങിയ വസ്ത്രങ്ങളിലേക്ക് നോക്കി പ്രകാശ് സ്വന്തം കരണത്തടിച്ചു.....
ഒരു പരസ്യ വാചകമാ എനിക്കോര്‍മ്മ വന്നത്..
"ടീവീം പോയി, ഡ്രെസ്സും പോയി, എല്ലാം പോയി.. വീ ഗാര്‍ഡ് സ്റ്റബിലൈസര്‍ ഇല്ലല്ലേ?? "
ഇല്ല..
"നന്നായി.. ഉണ്ടേല്‍ അതും പോയേനേ.."!!!!!!!
ഏതായാലും ഞങ്ങള്‍ റൂം വിട്ടിറങ്ങി..
താഴെ എത്തിയപ്പോള്‍ ചിരിച്ച മുഖവുമായി ഹൌസ് ഓണര്‍..
"എന്തോന്നാ ഇത്ര കിളിക്കാന്‍.. തന്റെ ആരേലും ചത്തോ???" പ്രകാശ് ചൂടായി..
"അല്ല.. ഒരു പഴംചൊല്ല് ഓര്‍ത്തിട്ടു ചിരിച്ചു പോയതാ.." അയാള്‍ മറുപടി പറഞ്ഞു.
"എന്തോ???"
"അല്ല.. പൊട്ടനെ ചട്ടന്‍ ചതിച്ചാല്‍ ചട്ടനെ ചെകുത്താന്‍ ചതിക്കും എന്നെനിക്കു മനസിലായി.."
ഇത് കേട്ടതും ഞങ്ങള്‍ മൂന്നു പേരും ഒരുമിച്ചു ചിരിച്ചു..
ഓണര്‍ ചിരി നിര്‍ത്തി ഞങ്ങളെ നോക്കി..
ചിരി നിര്‍ത്തി ഷിനോജ് മറുപടി കൊടുത്തു..
"പക്ഷെ കുരിശ് പോലും പേടിച്ചു പോകുന്ന ചെകുത്താനാ കൊച്ചിന്‍ ഹനീഫയുടെ രൂപവും കടമെടുത്തു തോള് ബനിയനും ഇട്ടോണ്ട് മുകളില്‍ നിക്കുന്നത്.... ചേട്ടനെ ദൈവം കാക്കട്ടെ..."
അതും പറഞ്ഞു ഞങ്ങള്‍ ഒന്നുകൂടി പൊട്ടിച്ചിരിച്ചു..
ചേട്ടന്‍ കഴുത്തില്‍ തൂക്കിയ കുരിശും പിടച്ചു മുകളിലേക്ക് നോക്കി..!!!!!!!!
ഞങ്ങള്‍ മൂന്നു പേരും പുറത്തേക്കു, കൈകളില്‍ ബാഗും മനസ്സില്‍ ഒരു വലിയ ചോദ്യവുമായ്..
"എങ്ങോട്ട് പോകും..????? "
പെട്ടെന്ന് രാവിലെ തെറി പറഞ്ഞു താക്കോല്‍ കൊടുത്ത ഓണറുടെ മുഖം മനസ്സില്‍ തെളിഞ്ഞു..
പിറകെ ഷിനോജ് പറഞ്ഞ ഒരു വാക്യവും മനസ്സില്‍ തെളിഞ്ഞു..
"ഇതാ നിങ്ങളുടെ ഭാര്‍ഘവീ നിലയത്തിന്റെ താക്കോല്‍.. ഇനി ഞങ്ങളുടെ പട്ടി താമസിക്കും അവിടെ.. "
പട്ടിയില്ലാതെ എങ്ങനാ അവിടെ വീണ്ടും കയറി ചെല്ലുന്നത്..??
എന്തായാലും കുഴപ്പമില്ല,കലേഷിനെ വിളിച്ചു ഒന്ന് കൂടി സംസാരിക്കാം.. അവന് പറഞ്ഞാല്‍ ചിലപ്പോള്‍ അയാള്‍ സമ്മതിക്കും..
കലേഷിനെ വിളിക്കാന്‍ ഫോണ്‍ കയ്യിലെടുത്തതും അതിലേക്കു ഒരു കാള്‍..
വിളിക്കുന്നത്‌ കലേഷ്‌ തന്നെ.. ഞാന്‍ സന്തോഷത്തോടെ ഫോണ്‍ അറ്റന്‍ഡ് ചെയ്തു..
"ഹലോ.. കലേഷ്‌.. നിന്നെ അങ്ങോട്ട്‌ വിളിക്കാന്‍ പോകുവായിരുന്നു.. നിനക്ക് നൂറു ആയുസ്സാടാ.."
"എനിക്ക് നൂറോ ഇരുന്നൂറോ ആയുസ്സുണ്ടായിരിക്കും.. പക്ഷെ നിനക്കൊന്നും അത്ര ആയുസ്സുണ്ടാവില്ല എന്ന് പറയാനാ ഞാന്‍ വിളിച്ചത്.." കലേഷ്‌ ചൂടായി..
"എന്ത് പറ്റി കലേഷ്‌??"
"എടാ പട്ടി... നിനക്കൊക്കെ ഒരു റൂം സങ്കടിപ്പിച്ചു തന്ന എന്നെ മുക്കാലില്‍ കെട്ടി തല്ലണം.. "
"ഇല്ല കലേഷ്‌.. ഞങ്ങള്‍ തല്ലില്ല.. ഞങ്ങളെ നിര്‍ബന്ധിക്കരുത്.. പ്ലീസ്.."
"വേണ്ടടാ.. നീയൊന്നും തല്ലേണ്ട..അതെനി ആ ഓണര്‍ ചെയ്തോളും.. അയാള്‍ ഫോണ്‍ വിളിച്ചു തെറി പറഞ്ഞതെ ഉള്ളു.. ഇനി എന്നെ കാണാന്‍ വരുന്നുണ്ടെന്ന്.."
"അപ്പൊ ഇതുവരെ അയാള്‍ വന്നു കണ്ടില്ലേ???" ഞാന്‍ ചോദിച്ചു..
"നിനക്കുള്ള മറുപടി നേരില്‍ കാണുമ്പോള്‍ തരം.. കേട്ടോട @$@&*(%@&($*@"
അതും പറഞ്ഞു കലേഷ്‌ ഫോണ്‍ കട്ട്‌ ചെയ്തു..
ഞാന്‍ ശിനോജിന്റെയും പ്രകാശിന്റെയും മുഖത്തോട്ടു മാറി മാറി നോക്കി..
അവര്‍ എന്നോടൊന്നും ചോദിച്ചില്ല.. കാരണം അവര്‍ക്ക് കാര്യാ മനസിലായി..
വീണ്ടും മനസ്സില്‍ പഴയ ചോദ്യം...
"എങ്ങോട്ട് പോകും..????? "
പെട്ടെന്ന് മൊബൈലില്‍ വീണ്ടും ഒരു കാള്‍..
ഞാന്‍ എടുത്തു നോക്കി.. വൈറ്റിലയില്‍ നിന്നും സിജു..
"എന്താടാ ??" ഫോണ്‍ അറ്റന്‍ഡ് ചെയ്തു ഞാന്‍ ചോദിച്ചു..
"അളിയാ. വൈറ്റിലയില്‍ ഒരു വീട് വാടകയ്ക്ക് കൊടുക്കുന്നുണ്ട്.... എന്റെ അങ്കിള്‍-ന്റെ വീട് ആണ്.. നിങ്ങളുടെ പരിചയത്തില്‍ ആരെങ്കിലും ഉണ്ടോ??? "
അവന് ഇത് ചോദിച്ചതും എന്റെ തലയ്ക്കു മുകളില്‍ 110 വോല്ടില്‍ ഒരു ബള്‍ബ്‌ കത്തി നിന്നു..
"സിജുവിന്റെ അങ്കിളിനെ ദൈവം രക്ഷിക്കട്ടെ...!!!! അവനെയും..!!!!!!!"
